Thursday, January 2, 2014

මං තාම පුංචියි නේද අම්මේ....

ඊයේ මාමා ආ වෙලාවේ 
නින්ද ගොස් නම් නෙවෙයි උන්නේ 
මාමා අම්මා එක්ක කියපුවා 
මමත් අහගෙන උන්නේ අම්මේ... 

මල් කොරහකින් මූණ බලලා 
පෝය දොළහයි තාම ගෙවුණේ
බුලත් හෙප්පුව අරන් යන්නට 
තාම කල් වැඩි නේද අම්මේ....

ලබන සතියේ අපේ පංතියෙ 
නුවර යනවා කිව්වා අම්මේ 
කවි තරඟෙ සහතිකේ ගන්නට 
මටත් යන්නට හැකිද අම්මේ... 

කෙල්ලො නවයක් බලාගන්නට 
තනිව අම්මට බැහැනේ අම්මේ 
අපුච්චා තව හිටියනම් මට 
ඉගෙන ගන්නට තිබුණා අම්මේ...